Deu 27 | NdeIBE | STEP | UMosi kanye labadala bako-Israyeli balaya abantu bathi: “Gcinani imilayo yonke engilipha yona lamuhla.

Deuteronomy 27

I-Alithare phezu kweNtaba yase-Ebhali

1 UMosi kanye labadala bako-Israyeli balaya abantu bathi: “Gcinani imilayo yonke engilipha yona lamuhla. 2 Kuzakuthi lapho selichaphile umfula uJodani langena elizweni lelo uJehova uNkulunkulu wenu alinike lona, lizamisa amatshe amakhulu liwahuqe ngekalaga. 3 Lizabhala kuwo wonke amazwi alumthetho nxa selichaphile umfula langena elizweni lelo uJehova uNkulunkulu alinika lona, ilizwe eligeleza uchago loluju, njengalokhu uJehova uNkulunkulu wabokhokho benu walithembisa. 4 Kuzakuthi lapho selichaphile umfula uJodani, lizamisa amatshe la phezu kweNtaba yase-Ebhali, njengalokhu ngililayile lamuhla, liwahuqe ngekalaga. 5 Khonapho yakhelani uJehova i-alithare, i-alithare lamatshe. Lingasebenzisi lutho olwenziwe ngensimbi phezu kwawo. 6 Yakhani i-alithare likaJehova uNkulunkulu wenu ngamatshe angabazwanga linikele phezu kwalo iminikelo yokutshiswa kuJehova uNkulunkulu wenu.

7 Lizanikela imihlatshelo yokuthula khonapho, liyidle lithokoze phambi kukaJehova uNkulunkulu wenu. 8 Ngakho lizabhala kancane wonke amazwi alumthetho phezu kwamatshe la eliwamisileyo.”

Iziqalekiso ezivela eNtabeni yase-Ebhali

9 Ngemva kwalokho uMosi kanye labaphristi, abangabaLevi, bathi kuwo wonke u-Israyeli, “Thula uthi zwi we Israyeli, njalo ulalele! Khathesi selingabantu bakaJehova uNkulunkulu wenu. 10 Lalelani uJehova uNkulunkulu wenu futhi lilandele imilayo kanye lezimiso engilitshela zona namuhla.”

11 Ngalona lolosuku uMosi walaya abantu wathi:

12 Nxa selichaphile umfula uJodani, kuzakuthi izizwana ezibalisa esakoSimeyoni, esakoLevi, esakoJuda, esakoIsakhari, esakoJosefa kanye lesakoBhenjamini zizakuma eNtabeni yaseGerezimu ukuze zibusise abantu.

13 Kodwa izizwana ezibalisa esakoRubheni, esakoGadi, esakoAsheri, esakoZebhuluni, esakoDani kanye lesakoNafuthali, zizakuma eNtabeni yase-Ebhali zimemezele iziqalekiso.

14 AbaLevi bazamemezela kubo bonke abantu bako-Israyeli ngelizwi elikhulu bathi:

15 “Kaqalekiswe umuntu obaza isithombe loba isithombe esibunjiweyo – into eyisinengiso eNkosini, umsebenzi wezandla zomuntu olobungcwethi – asimise ensitha.” Ngakho abantu bonke bazakuthi, “Ameni!”

16 “Kaqalekiswe umuntu othelela uyise loba unina ihlazo.” Ngakho abantu bonke bazakuthi, “Ameni!”

17 “Kaqalekiswe umuntu osusa isikhonkwane somngcele kamakhelwane wakhe.” Ngakho abantu bonke bazakuthi, “Ameni!” 18 “Kaqalekiswe umuntu oduhisa isiphofu endleleni.” Ngakho abantu bonke bazakuthi, “Ameni!”

19 “Kaqalekiswe umuntu ovimbela ukuthonisiswa ngokulunga kowezizweni, longelayise kanye lomfelokazi.” Ngakho abantu bonke bazakuthi, “Ameni!”

20 “Kaqalekiswe umuntu olala lomfazi kayise, ngoba ethelela umbheda kayise ihlazo.” Ngakho abantu bonke bazakuthi, “Ameni!”

21 “Kaqalekiswe umuntu olala lenyamazana.” Ngakho abantu bonke bazakuthi, “Ameni!”

22 “Kaqalekiswe umuntu olala lodadewabo, indodakazi kayise loba indodakazi kanina.” Ngakho abantu bonke bazakuthi, “Ameni!”

23 “Kaqalekiswe umuntu olala loninazala.” Ngakho abantu bonke bazakuthi, “Ameni!”

24 Kaqalekiswe umuntu obulala umakhelwana wakhe ensitha.” Ngakho abantu bonke bazakuthi, “Ameni!”

25 “Kaqalekiswe umuntu owamukela isivalamlomo ukuze ayebulala umuntu ongelacala.” Ngakho abantu bonke bazakuthi, “Ameni!”

26 “Kaqalekiswe umuntu ongalaleli amazwi okumlaya ngokuwenza.” Ngakho bonke abantu bazakuthi, “Ameni!”